作者:imSure

航空公司執笠 邊隻旅遊保險有得保?

2019年4月29日

航空公司執笠

邊隻旅遊保險有得保?

香港航空近日面臨財政危機及股權爭議,事件引起廣大迴響,不少旅客擔心一旦航空公司清盤或倒閉,手上持有的機票隨時化為烏有。其實香港有航空公司倒閉並非新鮮事。在2008年4月,以低價機票作招徠的甘泉香港航空在營運兩年多後突然宣布清盤結業,當時正值復活節旅遊旺季,加上部分留學生要趕回外地迎接新學期,約有3萬名已訂購甘泉機票的旅客受影響,最終獲其他航空公司即時提供特惠機票才能成行。

回到現在,如果外遊前夕突然收到航空公司「執笠」的消息,除了等待其他航空公司伸出援手,市面上究竟有哪些旅遊保險會提供航空公司清盤/倒閉的保障呢?


【家長懶人包】一家大細去旅行點揀旅遊保?


翻查資料,目前本港僅3間旅遊保險會提供有關航空公司倒閉的保障:


保險公司 最高保障額(港元)
立橋保險旅遊保險 旅遊25保險計劃:$10,000
旅遊75保險計劃:$20,000
旅遊200保險計劃:$30,000
藍十字﹕智在遊旅遊保險
(如受保人已繳付機票費用而該航空公司在旅程展開前宣佈倒閉可獲賠償因此而須購買替代交通票據合理額外開支。)
尊尚計劃:$2,000
智選計劃:$1,000
中國計劃:不適用
郵輪計劃:$2,000
中銀集團保險﹕環宇智選旅遊保障計劃
(只限香港旅遊業議會的註冊旅行社破產或航空公司倒閉)
銀計劃:$30,000
金計劃:$40,000
鑽石計劃:$50,000

保險公司隨時修訂保單條款 宜留意航空公司最新動向

不過大家要留意,藍十字及立橋保險早前已針對港航修訂保單條款內容。保險公司的網頁顯示,上述旅遊產品針對航空公司倒閉的保障項目,將不適用於選乘香港航空的客戶。換句話說,如果你已購買香港航空的機票,一旦遇上航空公司倒閉,將不獲任何賠償。雖然現階段中銀集團保險並未針對事件修訂條款,但大家應密切留意其網頁,並在購買保險前再查閱所有條款細節,看看港航是否仍在保障範圍之內。

「天氣不似預期」,保險有得保就固然好,否則一旦航空公司倒閉,又是否其他追討方法?


【旅遊錦囊】出門旅遊必備手冊:航班延誤篇


「旅遊業賠償基金」 單買機票無得賠

坊間部分隸屬航空公司的旅行代理商,現時會提供旅行套票以供選購。以香港航空為例,若果旅客是透過其子公司「港航假期」購買套票,即是包括機票、住宿及行程活動等,只要持有有效的印花收據,即使港航假期倒閉,都可以向 香港旅遊業議會轄下的「旅遊業賠償基金」,申請相當於外遊費九成的特惠賠償。不過有關賠償只限於旅議會的持牌旅行代理商,換句話說,若宣布清盤的是香港航空而非港航假期,旅客並不受保障;另外,若果你是單獨購買港航機票,亦不符合申請賠償基金的申請資格。

此外,根據消委會網頁,一旦有航空公司宣布破產,而法庭已對它發出清盤令或破產令,消費者亦可以向清盤人或受託人查詢如何提交「債務證明表」以追討賠償。

最後,溫馨提示大家,去旅行前除了要留意航空公司的最新消息外,亦需留意其他保障,因應行程比較及挑選適合自己的旅遊保險產品!



文章日期: 2019年4月29日

*本文章內容只供參考,imSure對任何人因使用或誤用任何信息或內容,或對其依賴而造成的任何損失或損害,不承擔任何責任。

簡單‧尋保
imSure保險比較平台
傳媒報導
作者:潛烏龜 x imSure

PADI 大路潛水牌一覽 (未學潛水必看!)

2019年4月11日

考慮緊學潛水嘅你,一定有聽過PADI (Professional Association of Diving Instructors)。究竟PADI 嘅潛水牌係點樣嘅一回事呢?邊個牌適合我呢?潛烏龜同你逐一介紹!


1. 開放水域潛水員 (Open Water Diver OW)


最初級,最初級,最初級嘅潛水牌係「開放水域潛水員」,一般俗稱O仔牌。一般人會誤會考潛水牌要係有好多經驗先得。其實唔係架喔,考O仔牌係唔需有潛水經驗嘅,只要你有基本嘅水性,健康嘅體魄就得。課程一般可以係4 - 5日內完成,包括理論堂同埋落水底嘅潛水堂。教練會教你潛水嘅基本理論同埋技巧,只要教練認為你應付得到,就會比你pass!拎住個O仔牌,你就可以潛落18米,踏出你嘅第一步(跨步式入水咁),睇D其他人睇唔到嘅海底世界!


2. 進階開放水域潛水員 (Advanced Open Water Diver AOW)


考完O仔,好多人都會考埋「進階開放水域潛水員」A仔牌。點解呢?首先成個課程通常2日就可以搞掂,一個weekend就okay,唔洗賴搵唔到時間學。另外你拎住A仔牌就可以深潛到30米同埋夜潛,可以去更多靚潛點到玩。你無A仔牌,出去外國潛水嘅時候,當地教練會望一望你,心入面冷笑一下,然後帶你去淺水地方遊花園算數。你要知道,大部分潛點都閒閒地都過20米,你落唔到去,咁你留係船上面好過啦。


3. 救援潛水員 (Rescue Diver)


會心思思諗學唔學「救援潛水員」Rescue嘅,你中嘅潛水毒都應該唔淺啦。 Rescue 教你嘅唔再係基本潛水技巧,而係教你係突發嘅意外情況下,點樣照顧自己同埋你嘅潛水Buddies。課程需要4 - 5日,有理論堂,亦都有潛水堂,同時加埋「緊急第一反應員」急救堂 EFR。你會同你嘅拍檔會輪流角色扮演,互相練習點樣處理唔同嘅意外情況。如果你考完A仔牌,累積左一定嘅潛水經驗,不妨考慮學埋Rescue。


4. 潛水長 (Divemaster)


「潛水長」DM可以話係休閒潛水嘅大佬。如果你一心想做潛水教練instructor,DM亦係你必經之路。你可以喺香港學,或者去外國學都得。係香港學嘅話,weekend潛水,要學差唔多一年。去外國學,日日潛,快則2 - 3個星期,慢慢學嘅2 - 3個月。係學新技巧嘅同時,你會幫間潛店帶客,好似工作假期咁,係一個畢生難忘嘅體驗。


5. 高氧潛水員Nitrox


「高氧潛水員」Nitrox算係一個分支嘅專長課程,O仔就可以學。唔洗落水,半日理論堂就搞掂,所以好多人會係冬天無水潛嘅時候上堂。考Nitrox嘅目的只有一個,就係要潛,盡,佢!你學嘅係點解吸支多d氧氣成分嘅樽係正d,同埋點樣安全咁吸。咩無減壓水底時間,咩水面停留時間,咩氧氣暴露,留翻上堂慢慢學。你想每次去dive trip都潛盡佢,諗諗Nitrox啦。


6. 適合出外潛水的旅遊保險



好多人都會去旅行學潛水,就要注意買返份保障到潛水嘅旅遊保險。 一般水肺潛水只要唔超過一定深度,都屬於承保範圍內。唔同保險公司對深度嘅要求各異,一般係30-40米內。另外,亦有旅遊保險要求參加者必須持有認可嘅潛水證書,同唔可以進行單獨潛水。


以下係各個保險公司對潛水嘅保障內容比大家參考:


保險公司 潛水
AIG 美亞 需加購自選保障
Allied World 世聯 受保
AXA 安盛 只限業餘運動
Blue Cross 藍十字 受保
Dai Sing 大新 受保
FWD 富衛 受保
Liberty 利寶國際 受保
MSIG 三井住友 受保
Prudential 保誠 受保
Starr 受保
Target 泰加 受保
Zurich 蘇黎世 受保

備註:潛水資料由潛烏龜提供,保險資訊由imSure提供



延伸閱讀︰潛烏龜 - 為什麼要在香港學潛水?

延伸閱讀︰潛烏龜 - 立即報名最新潛水課程


文章日期: 2019年4月11日

*本文章內容只供參考,imSure對任何人因使用或誤用任何信息或內容,或對其依賴而造成的任何損失或損害,不承擔任何責任。